luns, 11 de setembro de 2017

Xa podes ler a nosa web en galego

Por fin, a web de Inicia Literaria está activa en dous idiomas: galego e castelán. Dende o principio, era un dos nosos obxectivos, xa que as linguas son unha riqueza propia que gostamos de reflectir en calquera eido da vida, incluso no virtual. Deste xeito, ademais, quen desexe publicar a súa obra escrita en galego terá o respaldo dun sitio web redactado no seu mesmo idioma, e favorecer tamén a normalización da lectura na nosa lingua. Máis alá de prexuizos, nós lemos en galego, e ti?

domingo, 3 de setembro de 2017

Novidades de agosto

En agosto, a fábrica de ebooks de Inicia Literaria seguiu co forno a medio gas, pero, non obstante, si podemos falar dunha marabillosa novidade: a terceira parte das aventuras de Ned Cassidy, Luna Comanche

Nesta ocasión, o noso heroe irlandés enfrontarase a unha desapiadada cuadrilla de comanches capitaneados polo vingativo Caballo Moteado, que entran a sangue e lume na misión franciscana servida pola fiel apache Doña Lupe. Por sorte para o medio diaño, non se enfrontará só ao perigo, senón na compaña do arteiro mexicano Rosario Monleón.

Luna Comanche leva como capa outra obra mestra do ilustrador SamCube.

Ao igual que os anteriores, o libro está dispoñible no noso espazo en Lektu para a súa descarga de balde no modo de pago social. Por certo, de terdes curiosidade acerca do autor, Kenneth James, podedes ler a súa entrevista en KindleGarten, blog persoal do noso coordinador, Tomás Rivera.

Alén disto, gustaríanos presentar en pouco tempo algunha outra lectura, como a nosa primeira obra para lectoras e lectores en galego, novas incursións no xénero Western, ou intrigantes relatos para a hora do té.

Lembrade que podedes seguirnos en redes sociais e tamén facervos simpatizantes do noso colectivo. Máis información no noso correo electrónico, info@inicialiteraria.com.

Moitas grazas!

luns, 31 de xullo de 2017

Novidades de xullo

Este post podería terse titulado "As non novidades de xullo", mais non nos parecía serio (dado o noso carácter formal por todos coñecido, ehem...) así que seguimos coa serie iniciada alá por maio.

Xullo foi un mes moi pouco productivo en canto a lanzamentos de libros, por non dicir nada productivo posto que non sacamos ningún novo relato, nin colección. Non avanzamos tampouco na nosa anhelada poliglosia cara o galego. Nin sequera o noso número de seguidores ascendeu de xeito significativo. Iso non significa que o proxecto estea nun punto morto, senón que este mes, por cuestións alleas ao colectivo, foi movido para os coordinadores, e non lle dedicamos todo o tempo que este precisa.

Que se fixemos algo? Malia que aquí no se vexa? Si.

Avanzamos na corrección dalgúns originais que temos no noso haber. Analizamos opcións para activar a galeguización (querémola xa!). Valoramos (e descartamos, polo momento) a incorporación de novas coleccións. Amenazamos a Kenneth James para que axilice as novas entregas de Cassidy. E limos na praia. Moito. Que évos algo que tamén está ben.

Por todo isto, Pregámosvos encarecidamente, suplicámosvos con ardor, que non desesperedes, que imos avanzando como a burra Castaña (pasito a pasito cara a montaña), e que contamos con solucionar en agosto a seca de novidades literarias.
Michín e a súa amiga, a burra Castaña [fonte]

Contamos contigo, sufrida lectora! (ou lector). Apertas de oso (que seica son as mellores).

sábado, 1 de xullo de 2017

Novidades de xuño

O mes de xuño trouxo tres novidades literarias ao noso catálogo: a primeira, inaugurando mes, foi Yo, Gregorio, un fantasmal relato de Vanesa Santiago ambientado na cidade de Lugo. 

A carón del, publicamos tamén, e coma sempre en Lektu, de balde na modalidade de pago social:

- ...Y el infierno le seguía: a segunda parte das aventuras de Ned Cassidy, o personaxe medio-irlandés-medio diaño que coñecemos en Acaba con ellos, Cassidy. Ambas as dúas obras están escritas por Kenneth James e con capa de SamCube.

Capa de ...Y el infierno le seguía, deseñada por SamCube.

- Cuentos preliminares: antoloxía de relatos que teñen en común estar escritos e protagonizados por mulleres. O libro foi publicado orixinalmente en papel en 2011 e as súas autoras son Anna Raven e Rakel Archer. As ilustracións son obra de FH Navarro.

Con este título continuamos a serie "Té en la ventana".
Os nosos vindeiros proxectos céntranse en dar pulo á páxina en galego (dóenos ver que pasan os días sen que se vexa o noso traballo oculto ao respecto, mais é o que ten dedicarse ao colectivo no tempo de lecer) e publicar na nosa lingua materna algún traballo que xa está en proceso de corrección. Porén, non é o único que temos á espera... Non deixedes de nos seguir para estardes ao tanto dos detalles!

En canto ás cifras de seguemento en redes sociais, en troques, mantéñense en números baixos, contendo o noso entusiasmo: lográmosvos un ascenso tan lixeiro que podería dicirse que nos estancamos: 219 seguidores en redes sociais, soamente 22 máis que hai un mes. E a nosa campaña para acadar simpatizantes foi, sen medias tintas, un fracaso, pero relativo, eh? Vale que teñamos ata agora un único simpatizante, así e todo... vaites con el! O incombustible Paris Joel. Aínda estades a tempo de unirvos a el, escribíndonos a info@inicialiteraria.com. Alguén comentou que talvez sexa así porque a palabra, "simpatizantes", semella algo político. Non fagades caso desas parvadas. Queremos que sexades parte de Inicia Literaria!

sábado, 10 de xuño de 2017

Búscanse simpatizantes

Buscamos simpatizantes orgullosos do noso colectivo e que queiran aparecer como tales na nosa web, no apartado Quen Somos

Os nosos simpatizantes recibirán antes ca ninguén as nosas novidades comodamente no seu correo electrónico. 

Para facerte simpatizante de INICIA LITERARIA, non tes máis que enviarnos un email a info@inicialiteraria.com, co asunto “simpatizante”, e consignar no corpo da mensaxe o teu nome e de onde es, así coma outros datos (un par de liñas) que queiras que aparezan reflectidos na nosa web, como a túa profesión, os teus intereses, ou o teu sitio web. 

Síntete na túa casa con INICIA LITERARIA. Movémonos lentos pero seguros!
[Imaxe cortesía de Pixabay]

Ten en conta que somos un colectivo sen ánimo de lucro que só almacenaremos os teus datos para poder enviarche as nosas publicaciones e novidades e borrarémolos en canto te aburras de nós e nolo solicites a info@inicialiteraria.com, de acordo coa lei de protección de datos e co sentido común. Por suposto, non venderemos os teus datos a terceiros.

xoves, 1 de xuño de 2017

Novidades de maio

Repasando o pouquiño que levamos percorrido ata o de agora, sendo conscientes de que nos puxemos en marcha o pasado 22 de maio, estamos felices co resultado: moita xente interesouse polo colectivo, contando 193 seguidores soamente nestes días no total de redes nas que estamos presentes. Tamén varias persoas amosaron o seu interese para publicar no noso catálogo ou colaborar co proxecto doutros xeitos, o que nos enche de satisfacción porque nos permitirá ofrecer gran variedade de lecturas a quen nos siga e garantir a súa calidad, que é o que procuramos. Como sempre (sempre é dende hai dez días...), estas publicacións poderán descargarse de balde con pago social no noso espazo da plataforma Lektu.

A día de hoxe, temos publicadas dúas pequenas obras:

- Acaba con ellos, Cassidy. Un weird-western asinado por Kenneth James que relata as aventuras de Ned Cassidy, medio diaño, medio irlandés, no árido sur dos Estados Unidos de finais do século XIX.

Capas da segunda edición de "Acaba con ellos, Cassidy", obra do ilustrador SamCube.

- Yo, Gregorio. Un relato para ler nunha viaxe de autobús asinado por Vanesa Santiago que narra a azarosa vida de Gregorio, un home distinguido e máis ou menos ocioso da cidade de Lugo ao que ninguén semella coñecer.

E xa no forno outras novidades que irán saíndo nas vindeiras semanas e meses para deleitarnos.

luns, 22 de maio de 2017

Presentación do proxecto Inicia Literaria

Inicia Literaria évos un colectivo informal con inquedanzas literarias cuxos obxectivos son incentivar a lectura, a creación literaria e os estudos de temática literaria. Para dar saída a estas inquedanzas, crearemos diferentes coleccións de libros e documentos que iremos completando co pasar do tempo.

Gústavos o logo? Elixímolo porque cremos que un bo libro como máis se goza é acompañado dunha bebida quente...


Inauguramos o noso proxecto coa colección Lendas do Colt, que busca homenaxear un xénero que foi un dos máis populares do seu momento, o Western (a noveliña del Oeste) e facémolo contando coa maxistral pluma de Kenneth James, e o seu prometedor relato Acaba con ellos, Cassidy. Non dubidamos de que as promesas de hoxe serán os clásicos do mañá. Desexamos que gocedes coas aventuras do diaño irlandés tanto coma nós!